Monreyal, Kebèk, jou ki 28 out 2021-

Se pa ti kontan ekip KEPKAA a kontan anonse atis Dorothy Rhau, ki fè non li kòm «premye fanm nwa odyansèz frankofòn nan Kebèk ak nan Kanada, » aksepte pou li pòtpawòl 20èm edisyon « Mwa kreyòl Monreyal» la ki pral dewoule ane sa a sou tèm: « 20 lane, 20 pa fèm poukore lang ak kilti kreyòl la. »

Dorothy Rhau fèt Monreyal. Paran li yo fèt an Ayiti, nan vil Okay. Li enplike li anpil nan kominote ayisyen nan Monreyal la nan domèn radyo, televizyon ak nan plizyè asosyasyon pwofesyonèl.Nan premye rankont li ak òganizatè evennman an, li deklare yo: « Se pa ti anvi mwen anvi fè reyonnen limyè bèl lang ak bèl kilti sa a. »

Kòm odyansèz, Madam Rhau deja gen nan dyakout li plizyè espektak « solo ». Li deja kolabore avèk « Encore Spectacle », yon gwoup sou divètisman entegre ki gen baz li nan Monreyal. Li deja fè tou leve rido nan plizyè espektak odyansè «Mario Jean.»

Jounen jodi a, Madam Rhau konsakre preske tout tan li nan yon pwojè antreprenarya sosyal li pote nan fon kè li : « Audace au Féminin » ki se òganizatè « Salon International de la Femme Noire » epi lòt ankò. Anplis de sa : li te kwonikèz nan Danièle Henkel. TV, manm nan komite konsiltatif « Femme essor », anbasadris epi manm komite pou pri ekselans « Réseau des Femmes d’affaires du Québec, » e l ap syeje sou konsèy administrasyon « Fonds Afro-Entrepreneurs » epi « Maison-Marie-Claire Kirkland Casgrain. » Konsa, nou deja konprann pouki sa woulman tanbou salon li fonde a se : « Pinga nou pè, OZE! »

Fòk nou fè nou sonje « Mwa kreyòl Monreyal » la, espak edikatif epi fratènèl sa a, se yon evennman
miltikiltirèl epi miltidisiplinè ki la pou bay lang ak kilti kreyòl la valè. Li pran nesans li nan Monreyal jou ki te 5 oktòb 2002, sou labanyè KEPKAA. Jounen jodi a, yo selebre evennman sila a nan Amerik la, nan Karayib la, an Ewòp epi nan Oseyan Endyen an.

Pwogramasyon 20èm edisyon an chaje ak aktivite.  Espektak lansman an ap gen pou akeyi vyolonis matinikè Jean-Christophe Germain, youn nan ansyen manm gwoup mizikal « Malavoi » a. Pou akonpaye li, ap gen Yohan Cetout (klavye), Jimmy Louis-Marie (bas), Sacha Daoud (drum). Koral AROHCQ la ap patisipe nan randevou e tout espektak la pral yon omaj pou Jacob Desvarieux (chantè gwoup Kasav la ki kite nou) pou kontribisyon li nan avansman lang ak kilti kreyòl la.

N ap tan nou tout nan lansman an, samdi 2 oktòb, 8è pm, nan Collège Ahuntsic, 9155, ri Saint-Hubert, Montréal. Tandiske pou kloti a, samdi 30 oktòb, toujou nan Collège Ahuntsic, Mwa kreyòl Monreyal la pral akeyi Wesli Louissaint, ki ranpòte pri « Album de l’année-musique du monde » l’ADISQ la. L ap gen gwoup mizisyen li avèk li. Pou rès pwogramasyon an, tanpri fè taptap sou : https://moisducreole.ca.

KEPKAA di Madam Dorothy Rhau mèsi anpil pou jenewosite li. Pou antrevi yo, jouk nan dat 30 oktòb l ap disponib. Pou yon entèvyou ak li, rezève tikè antre nou nan lansman an (20$) oubyen rankontre ak kòdinasyon « Mwa kreyòl Monreyal » la, tanpri telefone nan : 514 750-8800 / 514 802-0546. Nou ka ekri nou tou : kepkaa@videotron.ca.

Bon Mwa kreyòl pou tout moun alawonnbadè!

0 commentaires

Soumettre un commentaire

Votre adresse e-mail ne sera pas publiée. Les champs obligatoires sont indiqués avec *